O Burela FS colabora coa Federación Galega de Doadores de Sangue na recollida de material para Haití
O CD Burela FS colaborará coa Federación Galega de Doadores de Sangue e a Irmandade de Doadores da Coruña na recollida de material sanitario para Haití, o vindeiro luns, 15 de febreiro, en Vista Alegre.
Durante a xornada de hoxe, representantes da Federación e do club laranxa percorreron os diferentes centros de ensino da vila co fin de informar sobre a campaña de axuda aos miles de damnificados polo terremoto do país sudamericano. A iniciativa, que tamén conta co apoio do Concello de Burela, céntrase na recollida material básico para a atención médica: vendas, gasas, esparadrapo, tiras adhesivas, guantes, máscaras, iodo, antisépticos, antiinflamatorios, paracetamol, aspirinas ou algodón.
Así, coincidindo co encontro da División de Prata ante o BP Andorra (21.00 horas), o CD Burela FS habilitará unha zona no pavillón para que o persoal da Federación de Doadores de Sangue poida recibir as contribucións dos mariñáns e mariñás. As persoas que así o desexen poderán depositar as súas achegas dende as 20.00 horas ata o remate do partido.
Todo o material reunido en Vista Alegre terá como destino os hospitais das cidades de Limani, Barahona e Azua, a onde chegan masivamente os feridos/as no tremor de terra que desolou Haití o pasado 12 de xaneiro.
Categorías
- Actualidade
- Reportaxes
- Equipo masculino
- Equipo femenino
- Pioneiras
- Historia
- Turismo
- Educación
- RSC
- Institucional
- Patrocinadores
Reportajes
Noticias destacadas