As Guerreiras arrincan en Alcorcón con reminiscencias de final
O Pescados Rubén Burela FS dará o pistoletazo de saída á competición de Primeira División este sábado, ás 18.00 horas, na pista de AD Alcorcón FSF, con reminiscencias de final. Laranxas e alfareiras volverán reencontrarse despois de tres meses e medio desde a final de play off de Málaga na que as Guerreiras se alzaron co título por 3-2. A cita poderá seguirse a través de Youtube.
Los Cantos recibirá as campioas cunha homenaxe moi especial á laranxa Cristina Pérez, polo seu labor como enfermeira en Madrid durante a pandemia; así o deu a coñecer o equipo local onte a través da cartelería do partido nas súas redes sociais.
Galegas e madrileñas estrearanse mañá formando parte do Subgrupo B, con 9 equipos, tras os últimos cambios de calendario, xunto a Universidad de Alicante, Rayo Majadahonda, FSF Móstoles, Xaloc Alacant e Sala Zaragoza, ademais dos recentemente ascendidos Intersala Promesas Zaragoza e Melilla Sport Capital Torreblanca. “É algo que eu nunca vivín deportivamente; en Italia, por exemplo, é un formato máis habitual. Témonos que axustar, estamos nunha pandemia, e isto é o que nos toca vivir”, reflexionaba Bea Mateos sobre as novidades de formato desta tempada, ante o reto inicial, unha primeira fase que finalizará o 13 de marzo.
O primeiro obxectivo será a pista de Alcorcón. “É un equipo moi completo, que ten todas as súas liñas ben cubertas. Non sei se será o mesmo de Málaga, pero sabemos que é un rival moi agresivo, con moita facilidade de gol. Temos que traballar frear eses aspectos” advertía a 14 burelista, desexando poñer sobre a pista todo o traballo dos dous últimos meses con tres amigables e un test de Copa Galicia: “Traballamos moi ben, foi unha pretempada moi longa. Toda a nosa evolución reflectiuse nos partidos; aos poucos imos encaixando mellor” valoraba a ala-peche, antes do enfrontamento ao Alcorcón, que recala despois de medirse a Futsi no Memorial Félix Aranda, nun encontro de moitos goles (8-5).
Unha nova tempada empeza con todos os soños e metas por diante; iso Bea Mateos teno moi claro. “Creo que este é un equipo feito para gañar, para ir a por todos os títulos e para defendelos todos. A nosa meta é sumar de tres en tres e oxalá poidamos repetir todos os títulos do ano pasado. Esta semana é de competición e nótase; non traballamos con todos o efectivos pero estamos preparadas para empezar ao cento por cento” aseguraba a salmantina.
Se non hai cambios de última hora, a expedición poñerá rumbo a terras madrileñas mañá, ás 8.00 horas, con todo o vestiario dispoñible, a excecpión de Cely, por un edema articular no xeonllo que a mantén afastada desde hai semanas. As internacionais Ale de Paz e Jenny, que se mediron como rivais nos amigables desta semana en Quinta dos Lombos entre España e Portugal, incorporáronse onte aos adestramentos. Tamén regresa Peque, despois de non poder gozar do partido de semifinais de XIV Copa Galicia o sábado, por unha luxación de ombreiro sufrida nun amigable fronte a Ourense Envialia.
Categorías
- Actualidade
- Reportaxes
- Equipo masculino
- Equipo femenino
- Pioneiras
- Historia
- Turismo
- Educación
- RSC
- Institucional
- Patrocinadores
Reportajes
Noticias destacadas