2020/21 Club deportivo Burela Fútbol Sala Único club con equipos masculino e feminino en primeira división
Pescados Rubén
Novas
13/10/2020
De ti a ti ante a gran solidez de Movistar
O Pescados Rubén Burela FS demostrou o grande orgullo de equipo e de carácter fronte ao titánico Movistar Inter esta tarde en Vista Alegre, fronte á solidez dun rival ao que os galegos souberon mirar de ti a ti sobre o parqué, igualando as forzas en moitas fases do partido. Con todo a falta de finalización penalizou en demasía ante o campión, que completou a curta vantaxe de 0-1 ao descanso co definitivo 0-3.

Corte en streaming

Despois de sufrir o segundo corte en streaming a través de Youtube esta tempada, o Pescados Rubén reafírmase na defensa ante os tribunais do dereito dos afeccionados para gozar de Fútbol sala. Hoxe puidemos emitir a través de Twitch. A estratexia de amedrentamento da Liga de Fútbol Profesional e da liga Nacional de Fútbol Sala non vai facer efecto na determinación desta entidade en defender os seus dereitos de televisión e os dereitos de todos os afeccionados.


Co ronsel da vitoria nestas dúas xornadas, o Pescados Rubén Burela FS e a Bomboneira gozaron dun gran ritmo e ocasións por ambos os lados. Quintela fixo tremer o pau no 3 de xogo, pero foi Eric Martel o que adiantou no 5; M. Kaluza xa freara a Tripodi cun unha gran resposta segundos antes. Tivo o empate unha das Xoias, Pitero, no 6, pero desartellouno Herrero coa cara. A partir de aí gañaron en actitude e temperanza os de Juanma Marrube fronte ao gran campión; fixeron un gran despregamento os do Mariskal cunha gran presión ante un Movistar impertérrito.

Enteireza e forza no regreso para os galegos. M. Kaluza mantivo o marcado sen moverse ante Pito na continuación. No 26 estaba Quintela preparado ao segundo pau para o empate ao pase de David Pazos pero as filas interistas evitárono. Tívoa despois o 20 laranxa, con nova aparición estelar de Herrero. Bruno Iacovino subiu o segundo no 28, a pase de Eric Martel. Cecilio puxo a proba á defensa local sen éxito, con bloqueo de Eto’o primeiro e gran saída de Kaluza máis tarde. Con 2-0, chegaron os minutos máis incisivos en exposición para os galegos; merecía o Burela o gol que lle dese ás no partido. A punto estivo de chegar o primeiro dos burelistas superado o ecuador do segundo acto entre Álex Diz e Pitero, pero aí estaba Martel para evitalo. O premio merecido non chegou tampouco no 32, cunha gran parede entre o mesmo tándem e aproveitaron os de Movistar para anotar o 0-3, cunha chegada de Pito, nun balón que superou ao meta local, con Dani Saldise empuxando de cabeza ao segundo pau.

Definitivamente o gol non estaba ao lado burelista. Iago Míguez dispuxo de dúas tentativas ao segundo pau, sen poder conectala. Tentouno máis tarde Eto’o por arriba pero fóiselle desviado. Con cinco e medio por diante, Quintela enfundouse na camisola de porteiro xogador. Boyis freou a Pitero, que foi un dos protagonistas sobre a rede interista no último tramo.

Ficha técnica

Pescados Rubén Burela FS: M. Kaluza, Lucho, David Pazos, Álex Diz, Quintela, cinco inicial; tamén xogaron Renato, Pitero, Giasson, Iago Míguez, Eto’o

Movistar Inter: Herrero, Tripodi, Raia, Borja, Pito, cinco inicial; tamén xogaron Cecilio, Dani Saldise, Boyis, Eric Martel, Bruno Iacovino, Fer Drasler

Goles: 0-1, minuto 5, Eric Martel; 0-2, minuto 28, Bruno Iacovino; 0-3, minuto 32, Dani Saldise

Árbitros: González Moreta // Sánchez Chamorro. Por Burela amarela para Pitero (minuto 5), Eto’o (minuto 30). Por Inter amarela a Fer (minuto 16), Boyis (minuto 28)

Incidencias: Partido correspondente á xornada 3 de Primeira División Masculina. Vista Alegre gardou un minuto de silencio inicial polo falecemento de Marcos Valhermoso, irmán do xogador laranxa Matamoros.

Publicidade
X Pechar