Jozi Oliveira e Daniel Giasson presentan a tempada en Mondoñedo
A porteira e o xogador do Pescados Rubén Burela FS puideron visitar recentemente o fermoso pobo de Mondoñedo, unha das vilas máis importantes e belas que se poden contemplar na Mariña lucense. Mondoñedo é un concello con moito que ofrecer no plano turístico, sendo ademais paso habitual de miles de peregrinos cada ano no seu camiño cara a Santiago de Compostela. Acompañados de Manuel Tapia, concelleiro de deportes, percorremos algúns dos lugares máis bonitos de Mondoñedo.
Manuel Tapia: "Como dicía o noso gran Álvaro Cunqueiro, Mondoñedo é a única cousa que enche o ollo do home”
Manuel Tapia fala orgulloso de Mondoñedo, como un concello repleto de historia e zonas de interese cultural: “Mondoñedo, como unha das cidades da Mariña lucense, ten un interese histórico e cultural dos máis destacados a nivel nacional. Como dicía o noso gran Álvaro Cunqueiro, 'Mondoñedo é a única cousa que enche o ollo do home'”. Pero tampouco nos podemos esquecer dun dos grandes focos de turistas da cidade, o Camiño de Santiago, polo que circulan decenas de miles de persoas todos os anos: “Cando vés facendo o Camiño do Norte e entras en Mondoñedo, esa contorna da praza e o centro histórico, é un preámbulo do que verán en Santiago. É a primeira catedral que van atopar ata Santiago".
Jozi Oliveira: “Temos o mellor do fútbol sala en Burela”
Jozi Oliveira é unha das xogadoras veteranas do equipo, coñecendo moi ben todo o que se avanzou nos últimos anos: “O proxecto do Pescados Rubén Burela FS desde o principio foi un proxecto de futuro, de continuidade. Así foi co feminino, unha aposta firme e seria polo equipo, polo deporte feminino, e foi bonito durante todos estes anos. Son moitos anos en división de honra, logramos ser campioas de España, e o traballo segue firme. Temos o mellor do fútbol sala en Burela”. Ademais, espera que no futuro máis compañeiras doutros equipos poidan gozar dun convenio colectivo: “Nós desexamos que toda a categoría poida gozar dun futuro próximo dun convenio así. Dálle visibilidade ao club e está ligado aos éxitos deportivos”.
Daniel Giasson: “A primeira meta é mellorar a tempada pasada”
Aínda que é un dos reforzos recentes do equipo, Daniel Giasson xa se integrou perfectamente ao equipo e ao club: “Desde o principio tiven moi boas impresións, do que era o equipo, do que é a familia do Burela. Unha palabra da que se fala moito dentro do vestiario e a verdade é que desde o principio notouse que se vive así o día a día do equipo”. Para a nova tempada os obxectivos son claros, mellorar a campaña anterior e lograr a permanencia: “A primeira meta é mellorar a tempada pasada. Sabemos que vai ser unha tempada atípica, un pouco diferente, pola situación actual na que vivimos”.
Mondoñedo: a mellor contorna cultural e natural
Mondoñedo é unha cidade fantástica da Mariña interior, onde a natureza e a cultura mestúranse nun enclave bonito e tranquilo. Son moitos os lugares que podemos recomendar da vila do poeta Álvaro Cunqueiro:
Catedral de Mondoñedo
Declarada Patrimonio da Humanidade pola Unesco, a catedral de Mondoñedo con máis de 800 anos de historia é unha construción magnífica, englobando bens de interese cultural e arquitectónico únicos. Está considerada como unha basílica única, mesmo recibe o nome de "Catedral arrodillada" pola súa escasa altura.
Cova do Rei Cintolo
Nesta cova únense o interese natural, cultural e histórico de Mondoñedo. Unha cova catalogada pola Dirección Xeral de Patrimonio como Xacemento de tipo Paleolítico, ligado ás primeiras etapas do home na terra.
Camiño do Norte
O Camiño de Santiago do Norte visita nunha das súas etapas a cidade da Mariña interior, sendo para os peregrinos de gran interese a Catedral e todo o marabilloso centro histórico de Mondoñedo.
Categorías
- Actualidade
- Reportaxes
- Equipo masculino
- Equipo femenino
- Pioneiras
- Historia
- Turismo
- Educación
- RSC
- Institucional
- Patrocinadores
Reportajes
Noticias destacadas