14/11/2019

Vista Alegre e os burelistas, en comuñón para que o duelo directo se ilumine de Laranxa

Vista Alegre e os burelistas, en comuñón para que o duelo directo se ilumine de Laranxa
Vista Alegre e os Laranxas buscarán, en comuñón, salvagardar os tres puntos en xogo de mañá, no duelo directo fronte ao Futbol Emotion Zaragoza. Na gran cita, que arrincará ás 21.00 horas, o Pescados Rubén Burela FS pelexará por dar continuidade á senda triunfal iniciada no último compromiso na casa.

“Estamos traballando ben, preparando moi ben a cita ante Zaragoza; sabemos que é moi importante e precisamos o mellor Vista Alegre. Xa o sentimos así con Peñíscola, a afección apoiounos moito e ao final puidemos lograr a vitoria” facía así referencia Luis López, Lucho, ao 2-1 fronte ao conxunto do ex–laranxa Juanlu Alonso, hai dúas semanas.

“É un equipo veterano, ten xogadores moi contrastados en Primeira e sempre é moi complicado, cunha defensa en zona que pode facer pasalo mal ao rival; estamos traballando para intentar contrarrestar iso e pelexar con todas as ganas polos tres puntos porque son verdadeiramente importantes para nós” advertía o xogador do Corgo sobre as fortalezas dos aragoneses.

Ambas as escuadras chegan á xornada 9 na busca da segunda vitoria da tempada pelexando por saír da zona de emerxencia, pechando a táboa. Con 5 puntos, e 1 de vantaxe sobre os da Mariña, o Zaragoza chegará tras o empate con Córdoba (3-3); o cómputo complétano a igualada inaugural ante Peñíscola (4-4) e o triunfo na pista do Jimbee Cartagena (2-3), na terceira xornada. “Creo que vai ser moi disputado, vai estar marcado pola necesidade dos dous equipos, pero creo que aquí Vista Alegre ten que saír vencedor. O ambiente da nosa casa ten que ser clave para dar continuidade ás vitorias, volver coller confianza e comezar así resultados positivos para ir para arriba” adiantaba o 4 burelista, reflexionando sobre a liña a seguir para conseguilo: “Ante a súa defensa en zona, moi correosa, temos que ter unha boa circulación de balón, cubrir ben os espazos na pista e intentar atacar e buscando sempre o dominio en cancha contraria”.

Despois dun calendario cos desprazamentos á pista de todos os todopoderosos, comeza unha nova etapa no regreso burelista á elite. No entanto, o peche tan só quere oír falar polo momento do rival deste venres: “Tan só podemos pensar agora mesmo en Zaragoza. É duro, xa o sabiamos, pero estamos cun bo xogo, medrando pouco a pouco. Creo que todos podemos dar un pouco máis, empezando por min mesmo, sobre todo de cara ao gol e tamén creo que estamos no camiño correcto, tan só precisamos confianza para seguir mellorando partido a partido tanto indiviual como colectivamente” puntualizaba Lucho.

A excepción de Iago Míguez e Amoedo, Juanma Marrube poderá dispoñer de todos os seus efectivos para o partido, se non hai cambios. O último adestramento está previsto para mañá, en Vista Alegre, ás 11.15 horas.

Kaluza, outra vez con Polonia

O meta Michal Kaluza volverá concentrarse coa Selección Polaca a principios de decembro, para medirse os días 2 e 3 a Serbia.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.