15/06/2019

Pescados Rubén está na Finalísima

Pescados Rubén está na Finalísima
As Guerreiras Laranxas cumpriron e volverán a protagonizar o duelo de titáns con Futsi Navalcarnero mañá (17.00 horas). Estarán na final do I Copa de SM A Raíña, arroupadas polo mausoleo burelista, tras saír vitoriosas no derbi irmandiño fronte a Ourense Envialia (5-2), encamiñando xa o partido na primeira parte, con 3-0. As máis de 1200 almas que asolagaron Vista Alegre ovacionaron a ourensá Bea Seijas, na súa retirada das pistas, cun aplauso de minutos e manteo incluído de ambas as escuadras.

Dany encamiñou o marcador antes de cumprirse o segundo minuto de xogo, na primeira chegada mariñá. Tras dúas intervencións moi oportunas de Ana Romero, no minuto 9, Bea Mateos enfundou a camiseta de porteira xogadora para atopar comodidade da escuadra sobre a pista e así chegou, antes do ecuador, o segundo, nas zapatillas de Peque. Reaccionaron as de Morenín cunha presión alta buscando dificultar a saída de balón rival na segunda medianía antes do descanso ás burelistas.

Ourense regresou con perigo e Sara Moreno reduciu no 23. Respondeu pouco despois o Pescados Rubén de novo coa capitá liderando o xogo de cinco. Ana Romero sacou un pé prodixioso no 29 ante Chiky e Dany, sempre intelixente, aproveitou no 32 unha indecisión entre Bea Seijas e Vane para o 4-1. O Ourense reduciu distancias tres minutos máis tarde, cun disparo de Sara Moreno que tocou na defensa burelista e confundiu á meta. Cumpríase o minuto 35 e continuou no seu empeño Morenín con porteira xogadora en busca da remontada, sen apenas xerar perigo. Aí estaba Peque, atenta a todo, para aproveitar e anotar o 5-2 a porta baleira no 38.

Ficha

Pescados Rubén Burela FS: Ana Romero, Dany, Cilene, Peque, Cami, cinco inicial; tamén xogaron Bea Mateos, Jenni, Luci, Lara Balseiro, Alves, Popó

Ourense Envialia FSF: Vane, Bea Seijas, Laura Doce, Marta, Sara Moreno, cinco inicial; tamén xogaron Judith, Chiky, Vera, Candela, Mery, Zaide

Goles: 1-0, minuto 2, Dany; 2-0, minuto 10, Peque; 3-0, minuto 20, Luci; 3-1, minuto 23, Sara Moreno; 4-1, minuto 32, Dany; 4-2, minuto 35, Sara Moreno; 5-2, minuto 38, Peque

Árbitros: Manteiga Rodríguez // Martínez Torres. Por Ourense amarela a Sara Moreno, Judith.

Incidencias: Partido correspondente á segunda semifinal de Copa de SM A Raíña (Burela, 14-16 de xuño) disputado en Vista Alegre, ante unhas 1200 persoas.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.