10/05/2019

Último derbi galego da liga, con Ourense (19.00 horas, TVG2)

Último derbi galego da liga, con Ourense (19.00 horas, TVG2)
Vista Alegre gozará mañá do último derbi galego de Primeira RFEF Liga Foro 16 Feminismo. O Pescados Rubén Burela FS recibirá o Ourense Envialia FSF ás 19.00 horas (en directo, TVG2), revivindo a gran pugna polo título irmandiño da Coruña, co que se alzaron as Guerreiras Laranxas. Será unha nova festa do fútbol sala, con entrada gratuíta.

A falta de 4 xornadas para o desenlace, as burelistas continuarán na pelexa polo gran soño, empatadas a 72 puntos con Futsi, no cumio da táboa. O conxunto mariñán volve á liga, tras o descanso polo Torneo Internacional de Moscova, disposto a todo. “Quédannos catro finais por diante para ir a por todas. Tivemos unha semana atípica, sen Peque, Luci e Jenny, pero contamos coa axuda da Fervenza e Rodiles para completar ben os adestramentos e a preparación do duelo”, explicaba a meta Ana Romero.

O Ourense Envialia chegará á Mariña pechando o podio, con 51 puntos, e procurando poñer terra por medio dos seus perseguidores, Jimbee Roldán e Poio Pescamar (50 puntos). Nos dous anteriores enfrontamentos, o marcador foi para as laranxas e ademais sen encaixar goles, con 0-2 na primeira volta e con 0-3 e título na final da XIII Copa Galicia, disputada o 21 de abril na cidade herculina; no entanto Ana Romero non lle pon a ninguén o papel de favorito:

“Cada partido é diferente; hai moita emoción e rivalidade. Os dous equipos xogámonos moito; nós non podemos fallar mirando para a Liga e o Ourense quererá defender a súa praza de cara á Copa da Raíña”, advertía a murciana, depositando os tres puntos nos pequenos detalles e confiando na “concentración e a forza do equipo” para sacar este encontro adiante.

“Temos que ser fieis a nós mesmas. Comezamos esta liga pelexando por un soño e así seguiremos ata o final; temos aí a oportunidade e iso pasa por gañar os catro partidos que nos quedan” confesaba Ana Romero.

Julio Delgado e Lucas non poderán contar con Alves, que continúa o seu proceso de recuperación do xeonllo con traballo individual. Tras o Torneo 9 de Maio de Moscova, as internacionais Jenny, campioa con Portugal, e Luci e Peque, subcampioas con España, chegarán a Burela esta tarde.

Convocatoria Pescados Rubén Burela FS: 1. Jozi, 3. Dany, 6. Cilene, 7. Peque, 8. Cami, 9. Jenny, 10. Lara Balseiro, 12. Ana Romero, 14. Bea Mateos, 18. Popó, 19. Lucía

Rivais na recta final

Nesta xornada, o Futsi visitará a pista do Poio Pescamar, na quinta praza. Os compromisos para as burelisas nas tres últimas xornadas serán viaxar a Murcia (8º), recibir a UA Alicante (7º) e pechar a liga na casa de Femisport (16º). O Atlético disputará tres duelos madrileños, con Majadahonda (11º), Leganés (12º) e Alcorcón (6º).

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.