23/03/2019

En xogo, necesidades diferentes en Zaragoza

En xogo, necesidades diferentes en Zaragoza
E quedan seis. O Pescados Rubén Burela FS afronta unha final máis, na xornada 25 de Segunda, coa visita á pista do Colo Colo Zaragoza, pechando a fin de semana (domingo, 12.30 horas, La Granja). Os mariñáns buscarán manter a renda da primeira praza (57 puntos) ante un rival que ocupa a 13ª posición, a 5 puntos dos postos de perigo.

“Estamos nunha dinámica positiva, iso dános confianza e sabemos desde hai xornadas que cada partido é unha final” incidía a última incorporación da escuadra laranxa, Joselito, advertindo que Zaragoza non será un camiño de rosas: “Será un partido moi complicado, nunha pista de goma, e fronte a un rival que vén de competir moi ben contra Betis, cunha derrota moi axustada (2-1). É un equipo físico e de envergadura, con moito perigo en xogo directo e con xogadores con experiencia” analizaba o 2 do Pescados Rubén, encomendándose á filosofía de Juanma Marrube para sacar adiante a cita: “Traballamos ben durante a semana para afrontar con garantías a cita. Sendo ordenados teremos moito gañado; non podemos contaxiarnos do seu xogo, como nos pasou a semana pasada con Rivas”.

Con 6 partidos de liga e 1 de Copa Galicia nas filas burelistas, o ala andaluz, que chegou no mercado de inverno desde Palma Futsal, atópase feliz na costa lucense: “Desde que cheguei non me faltou de nada, estou moi contento, tanto pola parte do club como dos compañeiros e corpo técnico; tratáronme coma un máis. Coa súa axuda a adaptación foi máis doada”, concluía así Joselito.

O equipo de Juanma Marrube partirá este mediodía cara ao seu destino da xornada 25. Ás baixas de Pitero e Iago Míguez súmase Matamoros, por unha pequena rotura de fibras no xemelgo dereito sufrida durante os adestramentos da semana.

Convocatoria Pescados Rubén Burela FS: 1. Edu, 2. Joselito, 4. Lucho, 6. Luisma, 7. Porto, 11. Juanfran, 12. Renato, 14. Pope, 15. R. Vargas, 17. Nito, 23. Imanol CD, 30. Hélder

Compromisos de podio

O conxunto galego disputará mañá o partido, coñecendo os resultados dos seus rivais directos. Na segunda e terceira praza respectivamente con 51 puntos, hoxe desprazaranse Betis a Talavera (undécimo) e Mengíbar a Barcelona (sexto).

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.