05/02/2019

Pitero, laranxa ata 2021

Pitero, laranxa ata 2021
A última Xoia Laranxa en ingresar na escuadra de Segunda LNFS, Christian Rivas García, coñecido como Pitero, seguirá sendo laranxa ata 2021. O novísimo ala-pivote do Pescados Rubén Burela FS estivo arroupado polo presidente, Manuel Blanco, e o adestrador, Juanma Marrube, na formalización da súa renovación para as dúas vindeiras tempadas.

“Estou moi feliz por seguir dous anos máis e oxalá sexan máis. É o club no que medrei, estou aquí dende pequeniño. É a miña casa e a miña xente e non podo pedir máis” confesaba ilusionado o 9 do Pescados Rubén Burela FS, recoñecendo un soño cumprido: “Antes de acabar a primeira volta, o club xa me trasladou a súa intención de renovación; foi todo moi doado porque ese tamén era o meu desexo. Para min é un orgullo que o club mostre deste xeito así a súa confianza en min e estou moi agradecido a Juanma, que me deu a oportunidade de xogar e aprender nesta categoría”, explicaba o burelao, aos seus 19 anos, con ganas de fútbol sala: “Esta é unha recompensa ao traballo e dáme máis forza para seguir neste camiño, aprendendo e medrando”.

Na súa primeira tempada de sénior e a pesar de que nas últimas semanas non puido participar por un proceso de pubalxia -do que evoluciona favorablemente-, Pitero leva disputados 15 encontros e con sinatura en 6 goles: “Creo que superou todas as miñas expectativas, esperaba unha boa tempada pero non así. Estoume adaptando moi ben, conto coa confianza do adestrador e lévome moi ben cos compañeiros; todo son axudas”, recoñecía o laranxa, devecendo con verse algún día na elite, xunto á escuadra mariñá: “Agora temos que centrarnos no obxectivo de volver a Primeira e oxalá poidamos estar moitos anos na máxima categoría”.

Manuel Blanco, pola súa banda, destacou a dedicación de Pitero como un exemplo na base. “Pitero asumiu o reto lanzado dende o club. Deu o paso adiante que lle pedía o adestrador con traballo e implicación, no seu primeiro ano como sénior. Así puido entrar na dinámica do equipo con minutos de responsabilidade e goles. Sen dúbida é unha promesa que ten un gran futuro por diante se continúa nesta liña, con constancia e traballo diario” explicaba o presidente burelista.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.