30/08/2018

Pope: 'Estou cómodo en Burela e moi contento de seguir un ano máis'

Pope: 'Estou cómodo en Burela e moi contento de seguir un ano máis'
O ala Sergi Orgillés Saiz, Pope, volverá defender esta tempada o 14 laranxa: “Estou cómodo en Burela e moi contento de poder seguir un ano máis. A tempada pasada fíxome mellor xogador e mellor persoa” confesaba o catalán, na compaña do presidente do Pescados Rubén Burela FS, Manuel Blanco, e o directivo Luis A. Guillén, compartindo a ilusión e confianza do novo proxecto que dirixirá Juanma Marrube: “Os xogadores novos adaptáronse moi ben, creo que lles estamos axudando bastante para que toda esta aclimatación sexa doada, nun equipo con moitas ganas e ambición por facer unha tempada bonita”.

“Sempre hai que ir a máis, como di Juanma, así que este ano pelexaremos por ser mellores. A liga é moi longa, empezando ben ou mal. Esperamos empezar con bo pé para que ese punto de motivación axúdenos nos seguintes pasos a dar” así manifestaba a súa declaración de intencións o 14 burelista,disposto a superar calquera tipo de obstáculo na evolución do cadro mariñán, sen quedar na beira.

Santiago, primeiro termómetro para a liga

O Torneo Burela Bonita desta semana brindaralles a ocasión aos burelistas de medirse a un rival co que se verán as caras en liga e co que os partidos, de derbi, son espectáculo garantido, o Santiago Futsal (19.30 horas), xunto a Noia Portus Apostoli-Palma Futsal (venres 31, 21.30 horas): “Será un bo torneo, con catro equipos fortes. É unha boa oportunidade para empezar con bo pé na casa e que a xente vexa que ten que vir a Vista Alegre, para seguir apoiándonos”, convidaba así Pope á Bancada Laranxa a asolagar Vista Alegre o venres e sábado.

“Cambiou moito o equipo, pero sabemos que será un partido moi duro cun rival moi correoso, nos derbis con Santiago sempre hai moita rivalidade” poñía en preaviso así o burelista, recoñecendo a súa predilección por unha hipotética final contra o seu antigo equipo: “Sempre é bonito xogar contra un ex-equipo. A ver se podemos gañar os dous e vernos na final”, concluía Pope.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.