26/08/2017

Vitoria do Pescados Rubén Burela por 4-2 ante o VV Pernis de Rotterdam

O Pescados Rubén Burela FS conseguiu a primeira vitoria da pretempada ao derrotar ao VV Pernis Rotterdam de Holanda (4-2), na primeira xornada do Torneo Internacional Cidade de Viana do Castelo de fútbol sala feminino. O conxunto que dirixe
Vitoria do Pescados Rubén Burela por 4-2 ante o VV Pernis de Rotterdam
O primeiro gol das burelistas chegou tras un ataque pola dereita que tras disparo de Dany rebotou na capitá holandesa, Suzanne, e introduciuse no portal defendido por unha moi acertada Bianca. Sen dúbida, a gardameta do VV Pernis foi a máis destacada do equipo de Rotterdam, con intervencións moi acertadas ante os constantes ataques do Pescados Rubén Burela FS, que se foi ao descanso con ese 1-0 no marcador.

Na reanudación, mantívose a tónica da primeira parte coas xogadoras de Julio Delgado atacando e dominando o choque e a defensa sen concesións das "oranges" que sorprenderon nun contragolpe e empataron aos dous minutos deste período, por medio da súa pívot, Jennifer, tras un roubo de balón en media cancha e plantarse soa ante Jozi baténdoa a media altura.

Os ataques das xogadoras da Mariña intensificáronse ante o marco holandés e froito diso chegaron case consecutivos o segundo e terceiro tanto laranxa (neste choque de negro, por coincidencia de cores), con dianas de Cilene tras culminar unha xogada persoal ben apoiada por Julia Forsiuk. Corría o minuto 8 e no 9 chegaba o 3-1 nun bonito remate de Lara Balseiro en xogada de ataque pola esquerda.

Nos minutos finais, o dominio burelao foi constante. A falta de dous minutos, Dany Domingos marcaba o cuarto de tiro cruzado trala mellor xogada do partido protagonizada polas súas compatriotas Cilene, omnipresente, e a recentemente incorporada, Tai Menezes. A incisiva pívot holandesa Jennifer anotaba o segundo do seu equipo a falta dun minuto e deixaba o marcador no definitivo 4-2 para Pescados Rubén Burela FS, que se enfrontará ao Poio Pescamar na estrea deste interesante Torneo Cidade de Viana do Castelo. As pontevedresas, perderon no seu primeiro partido ante o potente Benfica, campión de Liga e Copa portuguesa, por 2-0 no choque que abría o evento.

FICHA TÉCNICA

Pescados Rubén Burela FS: Jozi, Sara Correia, Lara, Bea Mateos, Dany -cinco inicial- Judith, Cilene, Tai Menezes, Julia Forsiuk, Sofía, Ana Romero.

VV Pernis: Bianca, Suzanne, Dunnia, Vivienne, Jennifer -cinco inicial- Sue, Felicia, Myrusha.

Goles: 1-0, Suzanne p.p., min 10; 1-1; Jennifer, min 22; 2-1, Cilene, min 28; 3-1 Lara, min 29; 4-1, Dany, min 33; 4-2 Jennifer, min 34.

Árbitros: Ferreira, Azevedo. Tarxetas amarelas para Lara, Bea e Vivienne.

Incidencias: Segundo partido do Torneo Internacional Cidade de Viana do Castelo, no pavillón Municipal Monserrate, 400 espectadores.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.