01/06/2017

Renato será laranxa ata 2021

Renato será laranxa ata 2021

Renato Lopes Furtado (Cabo Verde, 1997) será xogador laranxa ata 2021. A Xoia Laranxa, con contrato en vigor ata 2019, chegou a un acordo co Pescados Rubén Burela FS para amplialo por dúas tempadas máis. O presidente, Manuel Blanco, e o directivo José Ángel Dovale, destacaron a progresión do ala laranxa: “O ano pasado acabou a tempada disputando moitos minutos de responsabilidade, dando o paso adiante que lle pediron os técnicos e devolvendo a confianza que tiñan depositada nel. Renato reflicte a aposta do club pola canteira; medrou con nós e esperamos que siga progresando nesta nova etapa en Segunda, loitando e traballando xunto aos compañeiros” explicaba o dirixente burelista.



“Foi un ano difícil, pero a nivel persoal creo que demostrei o meu potencial e por iso me brindaron esta posibilidade” explicaba o 27 mariñán, facendo referencia á súa evolución persoal durante a última tempada: “Foi un ano no que madurei bastante; aprendín a escoitar e a reflexionar, ademais de intentar dar sempre o mellor de min, tanto nos adestramentos coma nos partidos”.



Despois de debutar en Primeira División en idade xuvenil no Palau Blaugrana e de dar o salto ao equipo sénior en 2016-17, para Renato esta será a súa primeira experiencia na competición de Segunda: “Teño moita ilusión nesta nova etapa; o meu obxectivo é seguir aprendendo e formándome. Estamos nun bo camiño; teremos unha portería moi sólida, iso daranos confianza, e no banco coñecemos moi ben o adestrador. Juanma coñece as nosas virtudes e as nosas debilidades e sabe como aproveitarnos ao máximo a cada un. Non vai ser doado pero se todos damos o mellor de nós imos conseguir grandes cousas; eu confío niso” explicaba moi motivado o ala burelista.



Renato Lopes é unha das referencias da base do Pescados Rubén e como tal sempre recibe o apoio dos seus compañeiros da escola, en todos os partidos: “Ter esa parte da bancada que sempre me anima dáme moita confianza para seguir traballando; creo que lles debo algo e intentarei agradecérllelo facendo as cousas ben sobre a pista” concluía o mariñán.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.