22/10/2016

Cuarto triunfo consecutivo, con brillo goleador de Dany (7-2)

Cuarto triunfo consecutivo, con brillo goleador de Dany (7-2)
O Pescados Rubén-Burela FS sumou hoxe o seu cuarto triunfo consecutivo con contundencia fronte ao FSF Rioja (7-2) nunha tarde con brillo goleador de Dany, con catro dianas, completadas por un dobrete de Cilene.

O guión de Vista Alegre comezou con iniciativa visitante no luminoso, cun Pescados Rubén un pouco frío na recta inicial; as de Logroño materializaron a súa primeira grande ocasión (minuto 13) cunha transición rápida finalizada por Patri tras perda laranxa. Foi o detonante que necesitaban as de Lucas e Julio para reaccionar e aplicar a intensidade 100% mariñá; pouco despois chegaba a igualada, en propia porta de Carmen (14), desde saque de Bea Mateos, e, en tan só un minuto, Dany deu a volta ao marcador; transcorría o minuto 15 e as burelistas xa eran donas da pista, do esférico e do marcador.

Continuou a festa futbolística con goles. Tras o perigo de Dany e Bea Mateos nos compases iniciais, o cuarto laranxa culminouno Cilene, de falta desde o bordo da área, xa no minuto 22. A meta rioxana freou o que podería ser o quinto, un balón de Elvira en corpo a corpo. Tivo entón Jozi os seus minutos de máis traballo, con eficaz resolución, ata que de novo Dany quixo volver brillar fronte á rede; en tan só un minuto, antes de chegar ao ecuador do segundo período, ampliou a fenda ata o 6-1. A precisión de Cilene volveu facer acto de presenza no 34 desde balón parado. As tímidas tentativas visitantes non conseguiron xerar perigo; tan só puido maquillar o resultado Carmen, no 35, ante unha novísima Nerea demasiado adiantada, que soubo defender a portería laranxa con eficacia na recta final da cita.

Ficha técnica

Pescados Rubén-Burela FS: Jozi, Dany, Bea Mateos, Judith, Cilene, cinco inicial; tamén xogaron Shiori, Lara, Elvira, Silvia, Sofía, Paula, Nerea

FSF Rioja: Sandra, Cris, Gloria, Carmen, Patri, cinco inicial; tamén xogaron Carro, Ainhoa, Silvia, Nahia, Miriam

Goles: 0-1, minuto 13, Patri, 1-1, minuto 14, Carmen (pp), 2-1, minuto 14, Dany 3-1, minuto 15, Dany; 4-1, minuto 22, Cilene; 5-1, minuto 28, Dany; 6-1, minuto 29, Dany; 7-1, minuto 34, Cilene; 7-2, minuto 35, Carmen

Árbitros: Naray Álvarez, José Luís (Viveiro) // Figueroa Veiga, Adrián (Lugo). Por Pescados Rubén, amarela a Judith (minuto 3)

Incidencias: Partido da sétima xornada de Primeira División RFEF disputado en Vista Alegre ante 500 persoas. Representando a Federación Galega de Fútbol, Carlos Méndez 'Negrín' fixo entrega da Copa de Liga 2015-16 ao equipo mariñán, que ofreceu á afección o trofeo, xunto ao recente galardón do Deporte Lucense de El Progreso

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.