09/06/2016

Homenaxe do Concello de Burela ás campioas

Homenaxe do Concello de Burela ás campioas

O Concello de Burela ofreceu esta mañá unha recepción oficial ao CD Burela FS Pescados Rubén como homenaxe ao segundo título de Liga para o conxunto laranxa. O alcalde, Alfredo Llano, e o concelleiro de Deportes, Ramiro Fernández, recibiron as campioas no salón de plenos do consistorio; equipo e corpo técnico estiveron acompañados polo presidente da entidade, Manuel Blanco, así como polos directivos Alba Vila, José Ángel Dovale e José Luis Sáez, xunto aos fundadores de Pescados Rubén, Cesarina Fanego e Rubén Blanco.




“Dende o Concello tan só reflectimos o sentimento de toda a vila con este xesto; o título é un premio a toda afección polo apoio e confianza que vos demostran. A vosa é unha fazaña perfecta con gran complexidade, con nada máis e nada menos que 18 vitorias consecutivas“ dáballes así a benvida e loaba os éxitos burelistas Alfredo Llano, puntualizando ademais Ramiro Fernández “o grande orgullo que supón para todos os burelaos/ás que este equipo nos represente e leve o nome de Burela por toda España”.




Como protagonistas dende a pista e o banco, a capitá, Maite, e o adestrador, Lucas, agradeceron todo o apoio e mostras de agarimo, con eloxios recíprocos: “Grazas a todos os que apostan por nós cada ano para que este proxecto se manteña e grazas ao corpo técnico polo seu gran traballo” dicía a xogadora emocionada, algo no que o técnico incidiu: “Grazas a Pescados Rubén, outras empresas, institucións e á directiva, e sobre todo moitas grazas á afección que nos acompañou sábado tras sábado. Para todo o corpo técnico foi un orgullo compartir a tempada con estas 15 xogadoras; esperamos poñer a guinda na Copa de España”.




Dende a directiva, Manuel Blanco destacou a valía do equipo para chegar ao máis alto, pedindo máis visibilidade e recoñecemento para o deporte feminino: “Este equipo xa o demostrou todo, superando moitas adversidades e sobrepoñéndose para volver facer historia e traer a Burela o segundo título de liga; se fose outro deporte, e masculino, este gran logro tería moita máis repercusión. Para que este proxecto siga adiante precisamos o apoio de todos, o compromiso de institucións e empresas privadas”.




O alcalde e o concelleiro de Deportes pecharon a recepción coa entrega dunha placa conmemorativa da xesta laranxa dando ánimos e desexándolles sorte ás mariñás na inminente Copa de España de Alcorcón (11-12 de xuño).

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.