30/10/2015

A seguir sumando: CD Burela FS-Orvina (sábado 31, 16.00 horas)

A seguir sumando: CD Burela FS-Orvina (sábado 31, 16.00 horas)

O CD Burela FS Pescados recibirá este sábado ao CD Orvina ás 16.00 horas, abrindo a Tarde Laranxa en Vista Alegre e como antesala do Burela FS-Jaén Paraíso Interior de LNFS. O de mañá será o último partido (en directo por streaming) en Vista Alegre de Primeira RFEF ata o mes de decembro, debido ao Campionato Mundial de Fútbol Sala de Guatemala (21-29 de novembro).



Precisamente da preparación con España, regresou onte Peque con dúas vitorias ante Hungría (6-0 e 8-1) e hattrick da burelista na última. “Coma sempre, foi unha experiencia boísima, con moita esixencia. Volvo con moi boas sensacións despois do segundo partido, no que melloramos bastante, e contenta por ir afinando puntería” relataba a xogadora.



A ala-pivote xa se reincorporou pola tarde aos adestramentos laranxas. “Botaba de menos as miñas compañeiras; estamos nunha excelente dinámica e tiña ganas de volver”. A 7 burelista confía en dar continuidade mañá á boa senda, aínda que tamén recoñece a dificultade do rival para as da Mariña. O Orvina chega a Burela logo de conseguir a súa primeira vitoria, fronte a Majadahonda (4-3), a semana pasada; ata entón só puntuara con empates ante Rioja (2-2) e Elche (0-0) nas dúas primeiras xornadas. “Hai que seguir sumando, pero temos que ter moito coidado con Orvina. O seu xogo atragóasenos un pouco; fóra gañáronnos os dous últimos anos e no último partido en Vista Alegre gañamos na recta final. Ademais melloraron o seu xogo de catro e creceron coa chegada de Anna Riera e Miriam” explicaba Peque.



“A nosa meta debe ser gañar todos os partidos e así a ver se podemos conseguir algo bonito ao final de tempada. Estamos nun momento en que podes perder en calquera pista; hai equipos que se reforzaron moito que aínda teñen moito que dicir nesta liga” falaba así Peque fuxindo da rivalidade con Navalcarnero na pugna polo liderado e ilusionada polo traxecto que lle queda por percorrer ao Burela FS, co apoio da afección: “Nótase que a xente está gozando máis este ano; iso nós notámolo desde a pista e dános forza” concluía a internacional



Convocatoria CD Burela FS Pescados Rubén: 1. Jozi, 5. Claudia, 7. Peque, 9. Gaby, 10. Lara, 11. Ceci, 13. Andrea C., 17. Maite, 18. Shiori, 31. Eva



Convocatoria CD Orvina: 1. Irati, 4. Aroia, 5. Anna Riera, 6. Miriam Arana, 7. Irune, 8. Patricia, 9. Lucía, 10. Susana, 11. Maialen, 13. Rebeca, 15. Yarima, 17. Adela

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.