Sabor de Galipizza na presentación de Kiko

A xogadora coruñesa de 24 anos asina por unha tempada coa escuadra laranxa á que chega “con moita ilusión xa que é unha gran oportunidade deportiva para min. É un paso adiante na miña carreira e poder competir por obxectivos máis ambiciosos é unha gran motivación”. Respecto da súa integración na dinámica do equipo indicou que “estou en fase de adaptación aínda que xa me sento moi cómoda no grupo. Estoume afacendo ás dobres sesións de adestramento, aquí realízanse máis que no meu anterior equipo e seguro que este traballo terá a súa recompensa”. Respecto da competición ligueira sinalou como rivais na candidatura ao título ao “Atlético de Madrid, vixente campión, aínda que poden acusar a baixa de Anita Luján que é un reforzo de luxo para o Alcorcón que este ano se reforzou moi ben e será un gran rival a bater. O Universidade de Alacante si gaña en consistencia tamén estará na pelexa e pode dar a sorpresa”.

O presidente do club, Manuel Blanco, cualificou a incorporación da xogadora galega como “un gran acerto. Kiko é unha xogadora que nos aportará moita frescura e intensidade, coa súa achega o equipo é máis equilibrado xa que é un á zurda que permitirá máis variantes ao xogo ademais de sumar unha rotación de garantías”.