Construíndo un soño

Obxectivo inmediato: conquistar a vitoria ante o equipo revelación da Primeira División, o Cidade de Alcorcón, terceiro clasificado con 46 puntos. O Burela FS Pescados Rubén lidera a clasificación con 61 puntos, un máis que o Atlético de Madrid Navalcarnero, segundo, que xa descansou mentres que ás mariñanas a súa quenda de descanso chega na derradeira xornada de competición.

Entrada gratuita. Vista Alegre. Sábado 27. 18.30 horas. Estas son as coordenadas para que a afección laranxa ofreza, unha vez máis, o seu apoio incondicional a un equipo con traxectoria intachable e moi próximo a certificar a súa condición de histórico.

Unha das máximas goleadoras, 25 goles, do equipo mariñao é Dany que agarda un partido “moi intenso e complicado ante un rival que xa nos gañou na primeira volta, aínda que foi un partido no que gozamos de moitas ocasións que non soubemos aproveitar”. A motivación e a ilusión do equipo “é máxima, estamos preparadas para pelexar cada balón. Temos un obxectivo precioso ao noso alcance e queremos alcanzalo”