Burela FS Pescados Rubén 1-2 CD Caja Segovia

O Burela FS Pescados quedou ás portas da súa primeira vitoria, esta tarde en Vista Alegre, fronte ao eficaz CD Caja Segovia (1-2), nun encontro repleto de ocasións para as dúas partes e no que os laranxas foron de menos a máis co paso dos minutos.

Cun inicio un tanto errático nos dous campos, o Burela FS tivo que aplicarse en defensa nos primeiros minutos debido a certas dúbidas na condución do esférico, con excelente resposta de Edu. Fabián, roldando o ecuador da primeira parte, adiantou os segovianos (minuto 10), nun rexeitamento de Edu. Tres minutos máis tarde, Antonio materializou o 0-2, tras escapada pola banda deixando atrás a defensa laranxa. As mellores ocasións burelistas chegaron tras o tempo pedido por Julio Delgado, nas zapatillas de Iago Míguez e Mimi, e máis tarde, con Enrique, que case conseguiu sorprender a J. Herrero nun lanzamento afastado. Con cinco faltas na cuadrícula local, os da Mariña probaron con xogo de cinco capitaneado por André, sen chegar a definir. Rozando o descanso volveron as ocasións para os laranxas. A punto estivo Enrique de abrir o marcador burelista tras un erro do meta rival aproveitado por André na área visitante. A falta de 9 segundos, con Hugo, partícipe xa na tentativa anterior, volveu o nerviosismo aos paus segovianos, aínda que que sen recompensa.

Máis presión buscou imprimir o cadro laranxa á volta, incidendo na rapidez do balón e cunha repartición máis equilibrada na perigosidade sobre a meta contraria. As magníficas oportunidades de Dani Martín (minuto 25), só ante o porteiro do Caja, e Iago Míguez (26), nun pase longo, abriron o pano para a eficaz finalización de Christian tras saque de esquina, no 28. Os de Vista Alegre non cesaron na procura da remontada, aínda que o empeño dos segovianos por ampliar distancias tampouco se desinflou e puideron darlle algún que outro susto a Edu. En torno ao 30 Mimi acariñou o esférico nun par de ocasións paseándose pola liña de gol. A falta de 6.40 puido estar o empate nunha nova iniciativa de Christian freado por unha decisión arbitral asediando a área rival. Nos dous últimos minutos de xogo, intentouno o Burela con Mimi como porteiro-xogador, sen éxito.