Empate amargo en Vista Alegre

O Burela FS empatou (3-3) ante o Unión África Ceutí nun partido que dominaron os laranxas, aínda que careceron da contundencia necesaria en momentos clave. O cadro visitante, pola contra, chegou en tres ocasións ao marco de Edu na primeira parte e no minuto 13 vencía por 0-2.

Reconduciron a situación os de Suso Rey na segunda metade, cun xogo máis directo e con maior intensidade. Tralo gol de Juanma, no 21, o Burela FS dispuxo de varias ocasións claras e acosou a meta ceutí. Adri Gaona e Juanma, de dobre penalti, déronlle a volta ao marcador co equipo visitante cargado de faltas e embotellado na súa área. Pero unha sanción discutible a Gaona no minuto 38 supuxo a segunda amarela para o xogador burelao e a consecuente expulsión. Esta circunstancia marcaría o resultado do partido, pois o cadro laranxa aguantou ben a defensa con tres homes ata os instantes finais. Pero, a falta de 7 segundos, Jacobo lanzou un balón que se colou na meta de Edu. Empate, cando xa estaban os tres puntos camiño do vestiario laranxa.