25/06/2010

Presentación da final de 'Todos polo Fútbol'

Presentación da final de 'Todos polo Fútbol'

O centro burelao da Asociación de Axuda ao Enfermo Mental da Mariña acolleu esta mañá a presentación da fase final da IV Copa Galega de Balompé ‘Todos polo Fútbol’, que terá lugar o vindeiro venres 2 de xullo, no pavillón Vista Alegre de Burela. Xunto á presidenta da entidade, Iris Castro, e a coordinadora do centro, Mª. José Nóvoa, o acto contou coa presenza do alcalde burelao, Alfredo Llano; a concelleira de Deportes, Neves Cando; a concelleira de Sanidade, Sonia Fraga; e o directivo do CD Burela FS Marcelino Luna.


Alfredo Llano manifestou a satisfacción da Administración Local por colaborar cun “proxecto ilusionante que promove o deporte en igualdade e no que os seus membros se benefician da actividade física e se divirten” e brindou a axuda municipal para iniciativas futuras. A concelleira de Deportes animou a todos os mariñáns e mariñás a deleitarse con esta cita e desexoulle ao equipo anfitrión, FS A Mariña, “o mellor na fase final, como xa demostrou ao longo de toda a liga regular”.


Pola súa banda, Iris Castro e Mª. José Nóvoa agradeceron o apoio prestado dende o Concello e o CD Burela FS “para facer realidade a Festa do Fútbol Sala para Todos en Burela, nun día no que se reunirán 11 asociacións galegas no Vista Alegre, en total máis de 300 persoas, entre participantes e acompañantes”. Dende a Asociación de Axuda ao Enfermo Mental tamén expresaron o seu desexo de que “todos os visitantes leven un grato recordo da Mariña”.


Finalmente, Marcelino Luna reiterou “o pracer que constitúe para o CD Burela FS contribuír a esta festa deportiva, na que o maior premio é a ilusión de todos os participantes” e felicitou o persoal do centro burelao polo “grande esforzo asumido para acoller a final do campionato en Burela e pola excelente planificación da cita”.


A fase final de ‘Todos polo Fútbol’, competición impulsada por FEAFES Galicia, tamén contará coa colaboración da Xunta de Galicia, Fundación Deporte Galego, Deputación de Lugo, Fundación Celta de Vigo, Gadis e Coca-Cola.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.