26/02/2010

O cadro de Suso Rey recibe o irregular Illescas, na quinta praza

O cadro de Suso Rey recibe o irregular Illescas, na quinta praza

O Burela FS recibe o irregular Illescas FS na vixésimo segunda cita do Grupo Norte de Prata, un conxunto que con continuos altibaixos conseguiu facerse coa quinta posición (31 puntos) e loita por coarse nos postos de play-off.


A partir das 18.30 horas, o Vista Alegre acollerá un duelo da metade alta da táboa, no que para calquera das dúas escuadras a vitoria supón moito máis que tres puntos; supón un pasiño máis cara á tan ansiada fase de ascenso. Os laranxas pelexan por conservar a súa actual segunda praza, ostentada por 41 puntos, dous máis có Gijón-El Llano, que é terceiro, e dous menos có líder, Talavera. Os toledanos están empatados co Colegios Arenas Gáldar, que ocupa a última posición, a cuarta, con privilexio de play-off.


Os burelistas chegan a esta cita co sabor agridoce dun empate inmerecido (3-3) en terras cacereñas. Pola súa banda, os toledanos intentarán desquitarse da derrota en Gijón (6-2). Na primeira volta, o triunfo recaeu nas arcas laranxas (1-2).


Suso Rey poderá contar de novo con Christian, apartado das pistas nas dúas últimas semanas por unha sobrecarga de cuadríceps. Quen non poderá participar será Javi Rodríguez, que cumprirá o único partido de suspensión imposto pola RFEF debido á súa expulsión en Cáceres.


Homenaxe Sub-20. O CD Burela FS renderalles tributo aos seus xogadores Turero, Brais e Manu polo recente título de campións de España acadado con Galicia, o 14 de febreiro no Campionato Nacional de Seleccións Territoriais Sub-20 (Santiago de Compostela). A xunta directiva homenaxeará os protagonistas da gran fazaña coa entrega duns trofeos conmemorativos nun acto previo ao encontro Burela FS-Illescas FS. 

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.