O CD Burela FS promoverá o Xacobeo en 2010

O CD Burela FS será unha das preto de 150 entidades deportivas de Galicia que promovan o Xacobeo en 2010 como club de alta competición. Así quedou hoxe formalizado en Santiago de Compostela a través da sinatura do contrato de patrocinio entre o secretario xeral para o Deporte, José Ramón Lete, e o director-xerente da SA de Xestión do Plan Xacobeo, Ignacio Santos, por unha banda, e o vicepresidente do club laranxa, José Saa Saa, pola outra.

O acto de presentación do ‘Plan Galego de Patrocinio dos Equipos de Alta Competición’, cun investimento total de 2,3 millóns de euros, reuniu a todas as entidades beneficiarias esta mañá no Hostal dos Reis Católicos. Xunto a José Saa, o club mariñán tamén estivo representado polo capitán do Burela FS, Juanma Marrube, a co-capitá do Burela FSF Pescados Rubén, Rosana Carballés, e o xogador xuvenil Boris Baltar.