25/10/2009

Brillante vitoria do Burela FSF, que accede á terceira posición da División de Honra

Brillante vitoria do Burela FSF, que accede á terceira posición da División de Honra

Cuarto triunfo consecutivo do Burela FSF Pescados Rubén que se coloca na terceira praza, con doce puntos, da División de Honra. O conxunto burelense logrou unha brillante vitoria por 3-0 ante o Ucam Murcia, que finalizou o encontro sen ideas e rendido nun Vista Alegre que rexistrou unha grande entrada.


A numerosa afección laranxa que asistiu á cita dominical gozou dun gran partido no que as pupilas de Javier Pardeiro demostraron, ademais da súa boa serie de resultados, que o seu nivel de xogo aumenta co paso de cada xornada. Desde o asubío inicial púidose ver un choque vibrante e con alternativas no dominio do xogo pero ambos os equipos esqueceran o instinto goleador nos vestiarios. En consecuencia, ao descanso chegouse cun empate a cero goles que, tras a continuación, Lucía modificou rapidamente cun gol desde a frontal. O 1-0 reforzou a confianza laranxa ante un conxunto murciano que acusou o golpe aínda que tampouco tardou moito en reaccionar; neses momentos de apuro local xurdiu a figura de Irene para deter calquera posible igualada.


O Burela logrou recomporse e a súa presión en pista contraria obtivo como beneficio o 2-0 que chegou por mediación de Rosana. A partir de aí, o Burela soubo manexar mellor o choque ca un Murcia desorientado que recorreu á opción de porteira-xogadora para acurtar a diferenza. O resultado foi o 3-0 logrado por Lidia tras un roubo de balón en media pista. Os últimos minutos de xogo foron un querer e non poder das murcianas ante un Burela que foi despedido cunha grande ovación pola súa afección.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.