18/09/2009

O Burela FSF inicia o seu periplo de Honra en terras catalás

O Burela FSF inicia o seu periplo de Honra en terras catalás

O Burela FS Feminino comeza oficialmente a súa andadura na División de Honra mañá, sábado, en terras catalás. Na súa primeira xornada na elite futbolística visitará o FS Construccions Queralt Gironella; o encontro comezará ás 19.30 horas, no pavillón municipal da localidade barcelonesa.


As xogadoras laranxas medirán as súas forzas a un dos habituais da máxima categoría. O FS Gironella milita en Honra dende 2004-05; 2008-09 foi a súa peor tempada, quedando na décimo terceira posición. O cadro burelista encara a súa estrea estelar como recente campión da XIX Copa Galicia, disputada en Ourense (12 e 13 de setembro). Baixo a tutela de Javier Pardeiro e xunto a Ro, Dolo, Marta, Cuchi, Irene e Claudia, heroínas laranxas que conseguiron o ascenso no seu primeiro ano de Prata, súmanse os reforzos de Raquel de Souza, procedente do Navalcarnero, Lucía Nespereira, do Ponte Ourense, e Lidia Mesías, do Valdetires Ferrol. A contribución máis nova protagonizarana as viveirenses Lara Balseiro e Carla Cora. 


Souza non poderá saltar á pista de Gironella no debut do Burela FSF; a ala-pivote brasileira ten pendentes tres partidos de suspensión para 2009-10. Claudia, cunha fascite plantar, e Marta, con molestias musculares, serán dúbida no vestiario de Javier Pardeiro para Barcelona.


Xunto ao Burela FSF e ao Gironella, 15 conxuntos participarán na División de Honra Feminina en 2009-10: Atlético de Madrid Navalcarnero, Cajasur Córdoba, Femesala Elche, Kupsa 4 Arcos Logroño, Móstoles FSF, Pinto Cellosa Torrejón, Ponte Ourense, Rioja Diamante, VP Soto del Real, UCAM Murcia, Valladolid FSF e Natudelia.com Zaragoza, que se conservan do exercicio anterior, e Castelldefels FS, Preconte Telde e CD Campillos, ascendidos en 2008-09. A competición contará cun total de 34 xornadas, que se prolongarán ata o 19 de xuño de 2010.


Caras novas. Aos adestramentos do cadro laranxa sumouse estes días a brasileira Silvania Alves de Almeida; a xogadora, con experiencia na liga paulista en clubs como o Suzano Jabaquara, estará a proba co conxunto un par de semanas.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.