Noticias
4 de xuño de 2016
O Burela FS Pescados Rubén, campión de Liga 2015-16
O Burela FS Pescados Rubén volveu facer historia. O conxunto laranxa converteu a 18ª vitoria consecutiva da tempada, en Logroño, na última xornada, no título de Liga 2015-16. A defensa do FSF Rioja (0-2) púxolles a meta difícil ás de Iván Cao 'Lucas', que conseguiron repetir a xesta de 2012-13 resolvendo o marcador na segunda parte, con Maite e Dany. As mariñás, que viaxaban moi concienciadas de facer os deberes recollendo os tres puntos no desenlace ligueiro, tiveron que armarse de paciencia. O Gonzalo de Berceo presenciou un guión xa escrito. As laranxas, hoxe de amarelo, asumiron a batuta do encontro pero o desacerto nos últimos metros tamén lles provocou momentos de certo nerviosismo que intentou aproveitar o conxunto local sen éxito. Tras as interminables ocasións de Peque -á escuadra-, Claudia -en recuperación-, Gaby -de lonxe-, Maite -dentro da área rioxana-, Bea -de costas fronte a Silvia-..., a 14 burelista protagonizou unha das máis perigosas das galegas cun disparo que freou a gardameta local e que se quedou morto fronte á rede sen atopar rematadora, antes do descanso. Jozi salvou sobre a bucina, desde o chan, un balón moitísimo perigo de Lucía. Forneceu efecto o tempo do descanso; Lucas pediulles serenidade ás burelistas, a paciencia e a constancia traerían o gol laranxa. Así, as mariñás regresaron co mesmo perigo ao terreo de xogo, sen tregua, pero máis incisivas. Maite fixo ver máis preto o soño polo que tanto traballaran e polo que tantas adversidades superaron ao longo da tempada; a capitá abriu a lata aproveitando a saída da meta riojana ante Peque, na banda contraria. Con 0-1, a escuadra galega reafirmouse en posesión e dominio, con máis tranquilidade. Antes de cumprirse a medianía do segundo acto, unha loita na que se aliaron Maite e Dany, ao bordo da liña de meta, fructificou no 0-2. Pouco despois a punto estivo de subir o terceiro, de Peque, en vaselina, pero foise moi alto. As locais continuaron na súa dinámica, moi serias en defensa, cunha gran contribución de Silvia baixo os paus. No 35, primeiro Jozi e en última instancia Peque desbarataron unha das mellores oportunidades do Rioja. Na recta final, o Pescados Rubén mantivo o tipo vendo cada vez máis preto o soño ata que estalou de xúbilo co asubío final. ¡GRAZAS POR FACER REALIDADE OS NOSOS SOÑOS! A Copa de España de Alcorcón está xa ao virar a esquina. As campioas de liga, e de Supercopa de España, protagonizarán un novo espectáculo do mellor fútbol sala feminino a próxima semana, 11-12 de xuño, con Atlético de Madrid Navalcarnero, Ciudad de Alcorcón e UA Alicante. Antes de volver ao traballo, tocan as celebracións; a expedición laranxa chegará mañá a Burela, no día grande das patronales, sobre as 14.00 horas, con rumbo ao recinto das festas para compartir a alegría do título ligueiro con toda a afección. Ficha técnica FSF Rioja: Silvia, Carmen, Rosa, Marta, Lucía, cinco inicial; tamén xogaron María, Patricia, Gloria, Paula CD Burela FS Pescados Rubén: Jozi, Dany, Peque, Gaby, cinco inicial; tamén xogaron Bea Mateos, Claudia Goles: 0-1, minuto 22, Maite; 0-2, minuto 29, Dany Árbitros: Alberto Abad Vicioso e Ernesto Cámara Peñaranda, do colexio rioxano. Sen amoestaciones. Incidencias: Partido correspondente á 30ª xornada da Primeira División RFEF disputado no pavillón Gonzalo de Berceo de Logroño
Introduce unha palabra para realizar a búsqueda de coincidencias entre todas as noticias.
Ou busca no noso arquivo as noticas publicadas con anterioridade.
Patrocinadores