Noticias
2 de novembro de 2010
O Ribadeo FS desaproveita dúas vantaxes ante o líder pontevedrés (6-3)

O Panificadora del Eo non puido rendibilizar as súas vantaxes ante o líder pontevedrés. O equipo ribadense fíxolle forzar a máquina ao potente Leis Pontevedra, que con pleno de vitorias encabeza Autonómica femenina e, como tal, sentenciou o encontro (6-3).

A xornada de descanso do equipo de División de Prata permitíalles ás pontevedresas dispor de varias xogadoras con experiencia en categoría superior, que vían transcorrer o tempo e perigar os tres puntos ao non poder perforar a ordenada defensa ribadense. A falta de tres minutos para o descanso, as locais iniciaban o ataque con porteira-xogadora, motivo polo que se viron sorprendidas sorprendidas co 0-1 no minuto 19, cun bonito gol conseguido pola porteira ribadense Vanessa desde a súa meta.

Na continuación, e ata o final do encontro, as locais mantiveron o ataque de cinco; así, o empate chegou no minuto 30 por mediación de Sandra. Poucos segundos máis tarde Iria materializaba no segundo pau o 1-2 para as ribadenses. Logo foi Bego no minuto 32 quen igualou de novo o marcador. A partir de aquí o Panificadora dispuxo de novas ocasións para adiantarse; estirou as súas liñas debilitando así a súa boa defensa, momentos que aproveitaron as xogadoras do Leis para irse ata o 6 a 2 no marcador con goles de Andrea Curra, Gema, Andrea Ferrón e Carmen. A ribadense Elvira conseguiu o 6-3 definitvo, dun potente tiro á saída da porteira.

Próxima xornada. O Concello de Mos FSF visitará Ribadeo o vindeiro sábado, ás 19.00 horas.

Ficha técnica

Leis Pontevedra FS: Irene, Magan, Sandra (1), Bego (1) e Andrea Ferrón (1), cinco inicial; tamén xogaron Gema (1), Andrea Curra (1), Nerea, Yoli, Elena, Natalia e Carmen (1).

Panificadora del Eo-Ribadeo FS: Vanessa (1), Eva, Elvira (1), María e Fátima, cinco inicial; tamén xogaron Iria (1), Arancha, Marta e Yoli.

Tarxetas amarelas: Sandra e Bego, polo Leis

Árbitros: Stefan González e Arturo Alvarez (anotador), da delegación de Ourense

 

OUTROS RESULTADOS

En Provincial masculina, o Ribadeo FS, coas ausencias importantes de Ismael e Javi Sarmiento, non puido manter a súa imbatibilidade e caeu a domicilio ante o Navia de Suarna (2-3). Esta derrota relega o equipo ribadense ao quinto posto, empatado a puntos co Becerreá e o Parrillada Puerta Santiago de Lugo. Os mariñáns deberán enfrontarse ao líder, Area 10, no Corgo o vindeiro sábado.

Pola súa banda, o filial ribadense, baixo o nome de Xoula-Ribadeo FS, caeu derrotado na primeira xornada de Provincial feminina ante a visita do potente Concello de Friol (2-4), campión da pasada tempada. O novo equipo ribadense está formado por seis xogadoras de categoría cadete (Antía -porteira-, Silvia, Laura, Elena, Carmen e Tania Penabad) e seis de categoría xuvenil (Tania García -porteira-, Montse, Marta, Elvira, Julia e Eva). No próximo compromiso, o Xoula deberá desprazarse a Outeiro de Rei.

Introduce unha palabra para realizar a búsqueda de coincidencias entre todas as noticias.
Ou busca no noso arquivo as noticas publicadas con anterioridade.
Patrocinadores