O Burela FS Pescados Rubén repite a súa aposta por consolidar a práctica deportiva na Mariña, co II Campus Mixto Internacional, presentado hoxe na casa consistorial burelesa. En torno a 60 rapaces da Mariña, Ourense e Asturias participarán nesta segunda edición, unha vintena máis que en 2007.
Ao acto, que contou coa presenza do responsable da Área de Deportes da Deputación de Lugo, Antonio Veiga, o rexedor burelés, Alfredo Llano, e a concelleira de Cultura, Deporte e Benestar Social de Burela, Neves Cando, tamén asistiron o representante de Caixa Galicia Esteban Gómez, o responsable de Deportes de El Progreso-A Mariña, Suso Pena,  o xerente de Living Sport, Antonio Couto, o director deportivo do club laranxa, Marcelo Santoro Neco, e o director das escolas deportivas do Burela FS, Alfonso Mera.